Англия терма жамоаси ЖЧ-2026 гуруҳ босқичи иккинчи турида Ганага қарши ўйин олдидан янги муаммога дуч келди.

Metro нашрининг хабар беришича, ҳужумчи Маркус Рэшфорд Хорватияга қарши ғалабали баҳсдан (4:2) сўнг мушакларида ноқулайлик ҳис қилган. У мазкур учрашувда захирадан майдонга тушиб, гол урган эди.

Шу сабабли 28 ёшли футболчи «Спортинг Канзас-Сити»га қарши ўтказилган назорат ўйинида иштирок этмади. Бу баҳсда асосан Англия терма жамоасининг захира футболчилари майдонга тушган. Яқин вақт ичида Рэшфорд қўшимча тиббий текширувдан ўтади.

Шунга қарамай, Англия йиғинида футболчининг жароҳати жиддий эмаслиги ва у Ганага қарши ўйинда қатнашиши мумкинлигига умид қилинмоқда.

Рэшфорд соғлиғи бўйича саволлар туғилган биринчи футболчи эмас. Аввалроқ ярим ҳимоячи Деклан Райс бел қисми ва сон орқа мушакларида ноқулайлик сезаётганини айтган эди. Букайо Сака эса ҳануз ахилл пайидаги муаммодан тикланиш жараёнини давом эттирмоқда.

Бош мураббий Томас Тухельнинг таъкидлашича, «Арсенал» вингери ҳозирча тўлиқ ўйин ўтказишга тайёр эмас ва у илк бор асосий таркибда гуруҳ босқичининг сўнгги учрашувида майдонга тушиши мумкин.

Эслатиб ўтамиз, L гуруҳининг биринчи турида Англия Хорватияни 4:2 ҳисобида мағлуб этган эди. Тухель шогирдларининг навбатдаги рақиби Гана терма жамоаси бўлади.