«Аталанта» клубининг қанот ҳимоячиси Марко Палестра тез орада «Интер»га ўтиши кутилмоқда.
Аввалроқ Италиянинг якунланган чемпионатидаги энг яхши ҳимоячисининг трансфери «Интер» учун бонуслар билан биргаликда 50 миллион еврога тушиши ҳақида хабар берилган эди.
Transfermarkt.it порталининг таъкидлашича, келишувнинг кафолатланган суммаси 45 миллион еврони ташкил этади. Агар ушбу трансфер амалга ошса, Палестра Италия А Серия тарихидаги энг қиммат харид қилинган ҳимоячига айланади. Айни пайтда ушбу рейтингни 2020 йилда Мадриднинг «Реал» клубидан «Интер»га 43 миллион евро эвазига ўтган Ашраф Ҳакимий бошқариб турибди.
Палестра 2025/26 йилги мавсумни ижара асосида «Кальяри» клубида ўтказди. Мазкур жамоа таркибида у 37 та учрашувда майдонга тушиб, 1 та гол урди ва 4 та голли узатмага муаллифлик қилди.
