Леверкузеннинг «Байер» клубида тўп сурувчи испаниялик футболчи Алехандро Гримальдо яқин вақт ичида Мадриднинг «Атлетико» клубига кўчиб ўтади.

Аввалроқ «матрасчилар» футболчи билан шахсий шартнома шартлари борасида тўлиқ келишувга эришгани ҳақида хабар берилган эди.

Таниқли инсайдер Николо Скиранинг маълумотларига кўра, 30 ёшли ҳимоячининг трансфери якуний босқичда турибди. Айни пайтда клублар келишувнинг сўнгги деталларини муҳокама қилишмоқда. Тажрибали футболчининг хариди «Атлетико»га 12 миллион еврога тушади.

Гримальдо Испания топ-клуби билан 2029 йилгача мўлжалланган, яна бир мавсумга узайтириш имконияти (опцияси) бўлган меҳнат шартномасини имзолаши кутилмоқда.

2025/26 йилги мавсумда Гримальдо барча мусобақаларда жами 46 та учрашувда майдонга тушиб, рақиблар дарвозасини 14 бор ишғол этди ва 12 та голли узатмага муаллифлик қилди.