Бразилия ва Гаити терма жамоалари ўртасидаги Жаҳон чемпионати учрашувининг биринчи бўлимида Рафинья Диас жароҳат олиб, захирага олинди.
«Барселона» клуби аъзоси сон орқа мушагини шикастлаб олди ва 40-дақиқада майдонни тарк этишга мажбур бўлди. Ушбу маълумотни Бразилия терма жамоаси расмий баёнотида тасдиқлади, бироқ футболчининг сафга қайтиш муддати ҳозирча маълум қилинмади.
«Рафинья Гаитига қарши ўйиннинг биринчи бўлимида ўнг сонининг орқа қисмида ноқулайлик ҳис қилди. Футболчи аллақачон тикланиш жараёнини бошлади ва тез орада қайта тиббий кўрикдан ўтказилади», — дейилади расмий баёнотда.
Эслатиб ўтамиз, «пентакампеонлар» Гаити терма жамоасини 3:0 ҳисобида мағлубиятга учратди. ЖЧ-2026 гуруҳ босқичининг 3-турида Карло Анчелотти шогирдлари Шотландияга қарши майдонга тушади. Ушбу учрашув 25 июнга ўтар кечаси, Тошкент вақти билан соат 03:00 да бошланади.
