Braziliya va Gaiti terma jamoalari o‘rtasidagi Jahon chempionati uchrashuvining birinchi bo‘limida Rafinya Dias jarohat olib, zaxiraga olindi.
«Barselona» klubi a’zosi son orqa mushagini shikastlab oldi va 40-daqiqada maydonni tark etishga majbur bo‘ldi. Ushbu ma’lumotni Braziliya terma jamoasi rasmiy bayonotida tasdiqladi, biroq futbolchining safga qaytish muddati hozircha ma’lum qilinmadi.
«Rafinya Gaitiga qarshi o‘yinning birinchi bo‘limida o‘ng sonining orqa qismida noqulaylik his qildi. Futbolchi allaqachon tiklanish jarayonini boshladi va tez orada qayta tibbiy ko‘rikdan o‘tkaziladi», — deyiladi rasmiy bayonotda.
Eslatib o‘tamiz, «pentakampeonlar» Gaiti terma jamoasini 3:0 hisobida mag‘lubiyatga uchratdi. JCH-2026 guruh bosqichining 3-turida Karlo Anchelotti shogirdlari Shotlandiyaga qarshi maydonga tushadi. Ushbu uchrashuv 25 iyunga o‘tar kechasi, Toshkent vaqti bilan soat 03:00 da boshlanadi.
