Португалия терма жамоаси ҳужумчиси Жоау Феликс Жаҳон чемпионати — 2026 гуруҳ босқичидан ўрин олган навбатдаги учрашувда Криштиану Роналду билан биргаликда асосий таркибда майдонга тушиши мумкин. Бу ҳақда Record нашри хабар тарқатди.

Жамоа бош мураббийи Роберто Мартинес Ўзбекистон терма жамоасига қарши кечадиган бўлажак баҳс учун турли тактик вариантларни кўриб чиқмоқда ва биринчи дақиқалардан бошлаб майдонга бир йўла иккита ҳужумчини тушириш эҳтимоли юқори.

Эслатиб ўтамиз, Португалия терма жамоаси мундиалдаги дебют ўйинида кутилмаганда очко йўқотиб, Конго ДР билан дуранг (1:1) ўйнаган эди.

Португалия ва Ўзбекистон терма жамоалари ўртасидаги баҳс сешанба куни, 23 июнь санасида бўлиб ўтади. Учрашувнинг бош ҳаками ҳуштаги Тошкент вақти билан соат 22:00 да янграйди.