Лондоннинг «Тоттенхэм» клуби «Ньюкасл» ярим ҳимоячиси Сандро Тоналининг трансфери устида ишлашда давом этмоқда.

Бундан бироз аввалроқ «қарғалар» 26 ёшли футболчини «шпорлар»га 80 миллион фунт стерлингга (тахминан 92 миллион евро) сотишни рад этгани маълум бўлган эди. Журналист Бен Жейкобснинг берган маълумотларига кўра, «Тоттенхэм» италиялик хавбек учун яна бир бор расмий таклиф билан чиқишни режалаштирмоқда. Шунингдек, ушбу трансфер пойгасидан «Манчестер Сити» клуби ҳам чиқиб кетгани йўқ.

Transfermarkt портали Сандро Тоналининг айни пайтдаги бозор қийматини 80 миллион еврога баҳоламоқда. Футболчи «Ньюкасл» сафига 2023 йилнинг ёзида «Милан»дан 60 миллион евродан кўпроқ маблағ эвазига келиб қўшилган эди.

Эслатиб ўтамиз, «Тоттенхэм» АПЛнинг якунланган мавсумида турнир жадвалининг 17-поғонасидан жой олди ва фақатгина сўнгги турдагина элитада жон сақлаб қолиш вазифасини уддалай олди.