Москванинг ЦСКА клуби ҳимоячиси Матвей Лукин Ўзбекистон миллий жамоаси ярим ҳимоячиси Аббосбек Файзуллаевнинг жаҳон чемпионатидаги илк голига муносабат билдирди.
Колумбияга қарши учрашувда (1:3) Файзуллаев Ўзбекистон терма жамоаси тарихида мундиаллардаги биринчи гол муаллифига айланди. Шунингдек, у XXI асрда жаҳон чемпионатларида бош билан гол урган энг паст бўйли футболчи сифатида тарихга кирди.
Матвей Лукиннинг айтишича, ЦСКАдаги собиқ жамоадошлари Аббосбекни қўллаб-қувватлаб туришмоқда:
«Албатта, Аббосни қўллаб-қувватлаяпмиз. Унинг гол урганидан жуда хурсандман. Бу Ўзбекистон терма жамоасининг жаҳон чемпионатларидаги биринчи голи. У билан ёзишдик, у мамнун ва хурсанд ҳолда ўтирган видеосини юборди. Мен унга бўшашмаслигини айтдим, чунки олдинда муҳим ўйинлар бор. Ҳазиллашиб, “энди кибрланиб кетма” дедим. Лекин у меҳнаткаш ва яхши йигит, бундай нарса унга хос эмас».
Эслатиб ўтамиз, Ўзбекистон миллий терма жамоаси тарихда илк бор жаҳон чемпионатининг финал босқичида иштирок этмоқда. Кейинги турда Фабио Каннаваро шогирдлари Португалияга қарши майдонга тушади.













