Лондоннинг «Арсенал» клуби ва Франция терма жамоаси марказий ҳимоячиси Вильям Салиба ўз ҳолати ҳақида гапириб берди.

25 ёшли футболчи жаҳон чемпионати гуруҳ босқичининг биринчи турида «уч ранглилар»га Сенегални мағлуб этишда (3:1) ёрдам берди ва барча 90 дақиқа давомида майдонда бўлди. Баҳорда марказий ҳимоячи «канонирлар» сафида Премьер-лига ғолиби ва Чемпионлар лигаси финалчисига айланган эди.

«Мен бир неча ойдан бери белимда оғриқ сезаяпман. Чидашга тўғри келди, чунки Премьер-лига ва Чемпионлар лигасида муҳим ўйинларимиз бор эди. Жаҳон чемпионати эса тўрт йилда бир марта ўтади, адреналин ҳам бу муаммони унутишга ёрдам беради», — дея Салибанинг сўзларини келтиради DailyAFC.

23 июнь куни Тошкент вақти билан соат 02:00да францияликларнинг Ироққа қарши баҳси бошланади.