Туркиянинг «Фенербахче» клуби «Марсель» вингери Мэйсон Гринвуднинг агенти билан алоқага чиқди. Бу ҳақда журналист Бершан Ташкая хабар бермоқда.

Манбанинг маълум қилишича, инглиз футболчисига йилига 10 миллион евро маош билан 4 йиллик меҳнат шартномаси таклиф қилинган. Аввалроқ, Гринвуд «Рома» клуби билан 2031 йилгача мўлжалланган ва йиллик маоши 5 миллион еврони ташкил этадиган келишувга эришгани ҳақида хабарлар тарқалган эди.

Қайд этилишича, «Фенербахче» футболчи билан қисқа фурсатда келишувга эришиб, «Рома»ни ортда қолдирмоқчи. Агар Гринвуд билан шартнома шартлари бўйича тил топишишнинг уддасидан чиқилса, Туркия топ-клуби «Марсель» билан расмий музокараларни бошлайди.

Ортда қолган мавсумда 24 ёшли вингер барча мусобақаларни ҳисобга олган ҳолда жами 45 та учрашувда майдонга тушди. Ушбу баҳсларда у рақиблар дарвозасини 26 бор ишғол этиб, 11 та голли узатмага муаллифлик қилди.