ФИФА парагвайлик шарҳловчи Хорхе Веранинг аккредитациясини бекор қилди. Бу ҳақда Ole нашри хабар берди.

20 июнь куни Парагвай терма жамоаси ЖЧ-2026 гуруҳ босқичи 2-турида Туркияни 1:0 ҳисобида мағлуб этган эди.

Учрашувнинг биринчи бўлими сўнгги дақиқаларида бош ҳакам Иван Бартон Парагвай терма жамоаси етакчиларидан бири Мигель Альмиронни майдондан четлатди. Маълум бўлишича, футболчи оғзини қўли билан ёпган ҳолда туркиялик Мерт Мюльдюрга мурожаат қилган. Бундай ҳолат учун қизил карточка бериш қоидаси жаҳон чемпионати бошланишидан олдин жорий этилган эди.

Мазкур қарордан сўнг Хорхе Вера жонли эфирда кескин фикрлар билдирди.

«Ўғри, ўғри, ўғри. Бартон, сен ўғрисан. Сен футболни ўлдирдинг. ФИФА, сен футболни ўлдирдинг. Инфантино, бунинг учун сен жавобгарсан. Ўғрилар. Улар бизнинг футболчимизни тортиб олишди. Ўғрилар. ФИФА, футболни бундай аҳволга келтирганинг учун жавобгарликни ўз зиммангга ол. Алехандро Домингес, КОНМЕБОЛ раҳбари сифатида нимадир қилишинг керак. Инфантино билан суратга тушишни камайтириб, жасорат кўрсат. Лаънати ўғрилар. Наҳотки жаҳон чемпионатида шуни кўришимиз керак бўлса? Бу шармандалик», — деди Вера эфир чоғида.

Орадан кўп ўтмай журналист ўз сўзлари учун узр сўради. Бироқ ABC телеканали уни жаҳон чемпионатига бағишланган барча дастурлардан четлатишга қарор қилди.

Жаҳон чемпионати-2026. D гуруҳи, 2-тур
20 июнь, шанба
Туркия — Парагвай — 0:1
Гол: Галарса, 2.
Четлатиш: Мигель Альмирон (Парагвай), 45+3.