Бразилия терма жамоаси ҳужумчиси Неймарнинг отаси Неймар да Силва ўғлининг 2026 йилги Жаҳон чемпионатидаги эҳтимолий дебюти арафасида унга далда берувчи мурожаат ёзиб қолдирди. Гуруҳ босқичи 3-туридан ўрин олган Шотландияга қарши баҳс 34 ёшли ҳужумчи учун мазкур турнирдаги дастлабки ўйинга айланиши мумкин. Боиси, у жароҳати сабабли дастлабки иккита учрашувни ўтказиб юборган эди.

«Яратган бизга шу вақтгача ёрдам бериб келди... Мана, вақт келди. Биз буларнинг барчасини биргаликда бошдан кечирамиз. Омад ёр бўлсин, ўғлим! Омад, Бразилия! Худо сени ўз паноҳида асрасин ва мададкор бўлсин! Югур, йигитча, югур — худди бу ҳаётингнинг сўнгги кунидек бор кучинг билан югур», — дейди катта Неймар ижтимоий тармоққа жойлаштирилган видеомурожаатида.

Бундан олдинроқ Карло Анчелотти Неймар «C» гуруҳи 3-тури доирасидаги Шотландия терма жамоасига қарши ўйинда иштирок эта олишини тасдиқлаган эди. Эслатиб ўтамиз, 17 май куни «Сантос» клубидаги ўйинда ўнг оёқ болдир мушагидан олган жароҳати туфайли Неймар ЖЧ-2026'даги дастлабки икки ўйинни ўтказиб юборишга мажбур бўлганди.