Ўзбекистон Миллий Олимпия қўмитаси раисининг биринчи ўринбосари Отабек Умаров футбол бўйича Ўзбекистон миллий терма жамоасининг жаҳон чемпионатидаги иштироки келгусида янги ғалабалар учун катта тажриба мактаби бўлишини билдирди ва йигитларимизни қўллаб-қувватлади.
"Барчамиз ҳар бир футболчимиз ва миллий терма жамоамиз билан фахрланамиз. Жаҳон чемпионатидек нуфузли мусобақада Ўзбекистон байроғининг ҳилпираши, давлат мадҳиямизнинг янграши ва юртимиз номи бутун дунё эътиборида бўлишига ушбу жасур йигитларимиз сабабчи.
Терма жамоамизнинг жаҳон чемпионатига йўл олгани нафақат ўзбек футболи, балки Янги Ўзбекистон спортининг улкан ютуғи сифатида тарихга муҳрланди. Бу натижа мамлакатимизда спортни ривожлантириш борасида амалга оширилаётган ислоҳотлар ўз самарасини бераётганини, Ўзбекистоннинг халқаро спорт майдонида муносиб ўрин эгаллаганини яна бир бор тасдиқлади.
Шуни алоҳида эътироф этиш керакки, терма жамоамизнинг ўйинини ҳамюртларимиз қатори бошқа давлатлардан ташриф буюрган мухлислар ҳам бевосита стадиондан туриб томоша қилишяпти, футболчиларимизни қўллаб-қувватлашяпти. Қаҳрамон йигитларимизнинг ўйинини бутун дунё кўрмоқда ва улар кўплаб мухлисларнинг қалбидан ўрин олишмоқда.
Минглаб ватандошларимиз қатори терма жамоамизни қўллаб-қувватлаш учун шу ерда эканимиздан мамнунман. Ушбу иштирок ва орттирилаётган тажриба келажакда янада катта зафарлар учун пойдевор бўлиб хизмат қилади. Бугун барчамизни бир мақсад – Ватан шарафи йўлида жипслашиш руҳи бирлаштириб турибди. Келинг, ҳал қилувчи баҳс олдидан футболчиларимизга янада кўпроқ далда бўлайлик, уларни бор кучимиз билан қўллаб-қувватлайлик, терма жамоамизга омад ва ғалабалар тилайлик".
