Италиянинг «Аталанта» клуби ҳимоячиси Марко Палестра Лондоннинг «Челси» жамоасига ўтишга жуда яқин турибди.

Таниқли журналист Лука Черкионенинг хабар беришича, футболчининг Лондон клубидаги биринчи мавсумдаги иш ҳақи ҳафтасига 100 минг фунт стерлингни ташкил қилади. Агар «кўклар» янги — 2026/27 йилги мавсум якунларига кўра Чемпионлар лигаси йўлланмасини қўлга кирита олишса, италиялик ҳимоячининг маоши автоматик тарзда ҳафтасига 140 минг фунт стерлинггача кўтарилади.

Маълумот учун, Марко Палестра якунланган 2025/26 йилги мавсумни ижара асосида «Кальяри» сафида ўтказди. Футболчи асли «Аталанта» клуби академияси тарбияланувчиси ҳисобланади ва бергамоликлар билан 2029 йилнинг 30 июнига қадар мўлжалланган шартномага эга. Палестра ортда қолган мавсумда «Кальяри» либосида барча мусобақаларда 37 та учрашувда майдонга тушиб, ўз ҳисобига 1 та гол ва 4 та голли узатмани ёздириб қўйди.