Винисиус Жуниор ЖЧ-2026 доирасида Бразилия терма жамоаси сафида навбатдаги голларини уришга муваффақ бўлди. Бу гал Шотландия терма жамоаси унинг қурбонига айланди.

Мадриднинг «Реал» клуби ҳужумчиси учрашувнинг 7-дақиқасидаёқ ҳисобни очган бўлса, биринчи бўлим сўнгида «селесао»нинг устунлигини икки баробарга ошириб, дубль қайд этди.

Opta статистика порталининг маълумотларига кўра, Винисиус жаҳон чемпионатлари тарихида гуруҳ босқичининг барча учта учрашувида гол уришга эришган Бразилиянинг бешинчи футболчисига айланди.

Бунгача бундай ноёб кўрсаткични фақатгина афсонавий Жаирзиньо (1970 йил), Ромарио (1994 йил), шунингдек, Ривалдо ва Роналдо (ҳар иккиси — 2002 йил) қайд эта олган эди. Эътиборли жиҳати шундаки, ушбу футболчилар кетма-кет голлар урган юқоридаги барча мундиалларда Бразилия терма жамоаси якунда жаҳон чемпионлигини қўлга киритган.