Германия терма жамоаси ва Лондоннинг "Арсенал" клуби ҳужумчиси Кай Хаверц ўзининг ўйин услуби ҳақида фикр билдирди.
27 ёшли футболчи Жаҳон чемпионати — 2026 мусобақасининг дастлабки иккита учрашувида рақиблар дарвозасига иккита тўп киритишга улгурди. Гуруҳ босқичининг учинчи туридан ўрин олган Эквадорга қарши баҳс олдидан форвард майдонда қандай ҳаракат қилиши ҳақида гапириб берди.
"Рақиб ҳимоячилари менинг қаердалигимни, қаерга ҳаракат қилаётганимни ва нима қилмоқчи эканлигимни ҳеч қачон билмасликлари керак. Мен улар учун арвоҳ бўлишга ҳаракат қиламан", — дея Хаверц Guardian нашрига берган интервьюсида айтиб ўтди.
Германия ва Эквадор терма жамоалари ўртасидаги учрашув бугун бўлиб ўтади, ўйин Тошкент вақти билан соат 23:00 да бошланиши режалаштирилган. Юлиан Нагельсманн шогирдлари аллақачон олти очко жамғариб, гуруҳда биринчи ўринни эгаллашни кафолатлаб бўлишган.
