Испания терма жамоаси гуруҳ босқичи якунларига кўра етти очко жамғариб, ЖЧ-2026нинг 1/16 финалига ишончли тарзда йўл олди. Сўнгги турда Луис де ла Фуэнте шогирдлари биринчи бўлим охирида Алекс Баэна томонидан киритилган гол эвазига Уругвайни минимал ҳисобда мағлуб этишди. Бундан аввал испанлар Саудия Арабистони устидан йирик ғалабага (4:0) эришишган ва Кабо-Верде билан дуранг (0:0) ўйнашган эди.
Opta маълумотларига кўра, бу Испания ўз тарихида илк бор жаҳон чемпионатининг гуруҳ босқичини дарвозаси дахлсизлигини сақлаган ҳолда (бирорта ҳам гол ўтказиб юбормасдан) якунлашидир.
Мундиал плей-офф босқичининг илк раундида амалдаги Европа чемпионларининг рақиби «J» квартетида иккинчи ўринни эгаллаган жамоа — ё Австрия, ёки Жазоир бўлади.
