«Манчестер Юнайтед» ва Уругвай терма жамоаси ярим ҳимоячиси Мануэль Угарте Жаҳон чемпионати гуруҳ босқичининг сўнгги туридан ўрин олган Испанияга қарши ўйинда (0:1) тиззасидан жиддий жароҳат олди. The Sun нашрининг қайд этишича, бу вазият инглиз клубининг ёзги трансфер кампаниясини сезиларли даражада қийинлаштириши мумкин.

Манба берган маълумотларга кўра, «Манчестер Юнайтед» раҳбарияти ҳозирда тиббий кўрик натижаларини хавотир билан кутмоқда. Агар ярим ҳимоячининг олдинги хочсимон пайлари узилган бўлса, у узоқ муддатга сафдан чиқишидан қўрқишмоқда.

Жароҳат олгунига қадар Угарте шу ёзда жамоани тарк этишга асосий номзодлардан бири ҳисобланаётган эди. Унга А Серия клублари қизиқиш билдираётгани ва «Юнайтед» раҳбарияти уни сотишдан тушган маблағни ярим ҳимоя чизиғини янада кучайтиришга йўналтиришни режалаштиргани хабар қилинганди.

Манкунианликлар аллақачон «Аталанта» ярим ҳимоячиси Эдерсоннинг трансфери бўйича келишувга эришган ва «Вест Хэм» хавбеки Матеус Фернандеш трансфери устида ишлашда давом этмоқда. Угартенинг сотилиши эса яна бир янги харидни молиялаштиришга ёрдам бериши керак эди.

«Юнайтед» учун қўшимча муаммо уругвайлик футболчининг юқори маоши бўлиши мумкин. АПЛнинг молиявий барқарорлик қоидалари доирасида зарар кўрмаслик учун клуб ушбу ўйинчининг сотувидан камида 29,4 миллион евро ишлаб олиши зарур.