Мексика, АҚШ ва Канададаги турнир бошланганидан буён ўтган дастлабки икки ҳафта ичида жаҳон чемпионати ўйинларига 3,6 миллион футбол мухлиси ташриф буюрган. Бу ҳақда FIFA маълумотларига таяниб NBC News хабар бермоқда.

Таъкидланишича, Германия – Эквадор ва Кот-д’Ивуар – Кюрасао ўртасидаги бир вақтда ўтган икки учрашувдан сўнг янги рекорд ўрнатилган. Ушбу учрашувларни қўшиб ҳисоблаганди мусобақаларни бевосита 3 605 357 нафар футбол ишқибози кузатган.

Ташкилот маълумотларига кўра, ЖЧ-2026’га ташриф буюрувчилар сони 1994-йилда АҚШда бўлиб ўтган жаҳон чемпионатида қайд этилган 3 587 538 кишилик рекорддан аллақачон ошиб кетган.

“Турнир иштирокчилари сонининг 32 тадан 48 та жамоага кенгайтирилиши ва бунинг натижасида гуруҳ босқичи ўйинлари кўпайгани, эҳтимол, рекорднинг бунчалик тез ўрнатилишига сабаб бўлган омиллардан биридир”, дейилади хабарда.

Шунингдек, АҚШдаги стадионлар ўтмишда футбол бўйича жаҳон чемпионатларига мезбонлик қилган ареналарга қараганда кўпроқ томошабин сиғдира олади. АҚШ Миллий футбол лигаси стадионларининг максимал сиғими 60 000 дан 80 000 нафаргача томошабинни ташкил этади. Гуруҳ босқичининг бир нечта ўйинига мезбонлик қилган Нью-Жерсидаги “Метлайф” стадиони 82 500 кишилик сиғими билан турнирнинг энг йирик спорт аренаси ҳисобланади.

FIFA маълумотларига кўра, Қатарда бўлиб ўтган сўнгги турнирдаги аксарият стадионлар тахминан 45 000 кишини сиғдирган.

Эслатиб ўтамиз, АҚШ, Канада ва Мексика майдонларида ўтаётган ушбу мусобақада тарихда биринчи марта 48 та жамоа иштирок этмоқда. 11 июнь куни бошланган турнир 19 июлга қадар давом этади. Мусобақанинг амалдаги ғолиби Аргентина терма жамоаси ҳисобланади.