Эрон миллий терма жамоаси бош мураббийи Амир Галенои Мисрга қарши кечган ўйиндан сўнг ўтказилган матбуот анжуманида АҚШ ҳукуматининг эронлик футболчиларга нисбатан муносабатини кескин танқид қилди. Мутахассиснинг таъкидлашича, ЖЧ—2026 мезбонларидан бири бўлган АҚШ футбол ва сиёсатни бир-бирига аралаштириб юбормоқда.

Мураббийнинг сўзларига кўра, футбол одамларни бирлаштириши ва сиёсатдан бутунлай холи бўлиши лозим. Бироқ АҚШ ҳукумати Эрон терма жамоасига нисбатан ўзининг сиёсийлашган ёндашувини яққол намойиш этмоқда.

“Мезбон мамлакат бизга нисбатан жуда адолатсиз муносабатда бўлмоқда. FIFA америкаликларнинг бу ёндашувига жиддий эътибор қаратиши шарт”, деди Галенои.

Хабарларга кўра, АҚШ Ички хавфсизлик вазирлиги Эрон терма жамоасига Сиэтл шаҳрига учрашувдан атиги икки кун олдин етиб келишга рухсат берган. Қолаверса, жамоа ўйин якунланиши биланоқ, ўша куннинг ўзида мамлакат ҳудудини зудлик билан тарк этиши талаб қилинган.

Бундан ташқари, ташкилотчилар Эрон терма жамоасига матбуот анжуманига ўзининг медиа-вакилини (матбуот котиби) олиб киришга рухсат бермаган. Таққослаш учун, Миср терма жамоаси устози матбуот ходими билан бирга чиққан ва анжуманда ўнлаб маҳаллий ОАВ вакиллари қатнашган. Амир Галенои матбуот залига кириб келганида эса журналистлар сони сезиларли даражада камайиб кетгани хабар қилинган.

Маълумот учун, "G" гуруҳининг учала учрашувида ҳам дуранг қайд этиб, 3 очко тўплаган Эрон терма жамоаси учинчи ўринни эгаллаб турибди. Регламентга кўра, энг яхши кўрсаткичга эга 8 та учинчи ўрин эгаси плей-оффга йўл олади. Ҳозирда Эрон ушбу рўйхатда 6-ўринда бормоқда ва жамоанинг мусобақадаги келажаги бошқа гуруҳлардаги натижаларга бевосита боғлиқ бўлиб қолган.

Қайд этиш жоиз, Эрон плей-оффга чиққан тақдирда ҳам, гуруҳ босқичидан муддатидан аввал чиққан АҚШ терма жамоаси билан кейинги босқичда тўқнаш келмайди. Эслатиб ўтамиз, тарихда илк бор 48 та жамоа иштирок этаётган ушбу мундиал АҚШ, Канада ва Мексика майдонларида бўлиб ўтмоқда ҳамда турнир 19 июль куни ўз ниҳоясига етади.