Саудия Арабистони футбол федерацияси президенти Ясир ал-Мишал мамлакат терма жамоаси ЖЧ-2026 плей-офф босқичига чиқа олмаганидан сўнг ўз лавозимини тарк этди.

Гуруҳ босқичида грециялик мураббий Георгиос Донис қўл остидаги жамоа Уругвай (1:1) ва Кабо-Верде (0:0) билан дуранг ўйнади, шунингдек, Испанияга (0:4) йирик ҳисобда имкониятни бой берди.

«Мен ва ҳамкасбларим Саудия футболига хизмат қилиш учун бор кучимизни ишга солдик ҳамда ватанимиз ва мухлисларимизнинг орзу-умидларини рўёбга чиқаришга чин дилдан интилдик.

Бироқ миллий терма жамоамизнинг Жаҳон чемпионатининг кейинги раундига йўл ололмагани умумий амбицияларимизга мос келмайдиган натижа бўлди.

Бунинг учун тўлиқ масъулиятни ўз зиммамга оламан ва терма жамоадан бундан кўра муносиброқ иштирок кутган барчадан узр сўрайман.

Жорий муддатим якунига етгунга қадар ўз фаолиятимни давом эттирмасликка қарор қилдим. Белгиланган тартиб ва регламентларга мувофиқ, тез орада янги директорлар кенгашини сайлаш жараёнини бошлаймиз», – деди 2019 йилдан буён ушбу лавозимни эгаллаб келган функционер.