Ўзбекистон миллий терма жамоаси собиқ ҳужумчиси Сервер Жепаров Фабио Каннаваро шогирдларининг жаҳон чемпионатидаги иштирокига баҳо берди.

«Бундай турнирда тажриба етишмади. Бу Ўзбекистон учун дебют жаҳон чемпионати ҳисобланади. Колумбия ва Португалия биздан анча кучли. Конго ДР эса кучимиз етадиган рақиб эди. Аммо биз футбол ўйнашни ўрганишимиз керак, футбол ўйнаш дегани – тўп билан ҳаракат қилишни англатади, биз эса барча ўйинларда тўпсиз ҳаракат қилдик. Ўзбекистон учун бу номақбул ҳолат, биз тўп билан ўйнашимиз, устунлик қилишимиз шарт, бу бизнинг кучли томонимиз. Ҳимояланиш ҳам керак — бу ўйиннинг муҳим элементларидан бири. Аммо тўпни олиб қўйгандан кейин қандай ўйнаш ҳам тактик жиҳатдан белгиловчи чизма ҳисобланади, шунчаки узоқроққа тепиб юбориш эмас. Учта ўйин статистикаси шуни кўрсатадики, терма жамоамиз тўпсиз ўйнади. Бизда кучли Европа чемпионатларида ўйнайдиган уч нафар футболчи бор, бу жуда кам. Тўғри таҳлил қилиш ва келажакда жаҳон чемпионатларига рақобатбардош тайёргарлик кўриш ҳамда иштирок этиш, энг муҳими, уларда муносиб қатнашиш учун 4-8 йиллик стратегияни ишлаб чиқиш керак», — деди Сервер Жепаров.

Эслатиб ўтамиз, Ўзбекистон терма жамоаси ЖЧ-2026 «К» гуруҳининг сўнгги турида ДР Конгога 1:3 ҳисобида имкониятни бой берди. Ўзбекистон терма жамоаси сафида Элдор Шомуродов гол муаллифига айланди.