«Борнмут» клуби ҳужумчиси Эли Жуниор Крупи фаолиятини Францияда давом эттириши мумкин. У аввалроқ ушбу мамлакатнинг «Лорьян» жамоасида тўп сурган. Бу ҳақда ParisTeam нашри хабар тарқатмоқда.
Манбанинг хабар беришича, ёш форвард «ПСЖ» клубига кўчиб ўтишга ўз розилигини берган. Бироқ ушбу трансфер «Борнмут»нинг молиявий талаблари туфайли бироз қийинлашиши мумкин. Парижликлар ҳужумчи учун ортиқча пул тўлаш ниятида эмаслар.
Эслатиб ўтамиз, аввалроқ Крупининг трансферига Каталониянинг «Барселона» клуби жиддий қизиқиш билдираётгани ҳақида хабарлар берилган эди. Ортда қолган 2025/26 йилги мавсумда ҳужумчи 35 та учрашувда майдонга тушиб, ўз ҳисобига 13 та гол ёздириб қўйишга муваффақ бўлган.
