Уругвай миллий терма жамоаси бош мураббийи Марсело Бьелса жамоа билан хайрлашув учрашувида Жаҳон чемпионати — 2026 мусобақаси давомида футболчиларнинг унга бўлган муносабатидан қаттиқ хафа бўлганини билдирди. Бу ҳақда таниқли журналист Себастьян Жованелли хабар бермоқда.

Манбанинг маълумотларига кўра, Мексиканинг Плайя-дель-Кармен шаҳридаги терма жамоа қароргоҳини (базасини) тарк этишдан олдин 70 ёшли аргентиналик мутахассис футболчилар билан қисқача суҳбат ўтказиб, мусобақадаги иштирок якунларини сарҳисоб қилган. Бьелса биринчи навбатда жамоа етакчиларига юзланиб, Жаҳон чемпионатини жуда ёмон кайфиятда тарк этаётганини, чунки улар уни бутунлай ёлғиз қолдиришганини айтган.

Эслатиб ўтамиз, Уругвай терма жамоаси «H» гуруҳида 3 та ўйиндан сўнг бор-йўғи 2 очко жамғариб, 3-ўринни эгаллади ва плей-офф босқичига чиқа олмади. Уругвайликлар Саудия Арабистони (1:1) ва Кабо-Верде (2:2) билан дуранг ўйнашган бўлса, Испания терма жамоасига (0:1) имкониятни бой беришди.