Urugvay milliy terma jamoasi bosh murabbiyi Marselo Byelsa jamoa bilan xayrlashuv uchrashuvida Jahon chempionati — 2026 musobaqasi davomida futbolchilarning unga bo‘lgan munosabatidan qattiq xafa bo‘lganini bildirdi. Bu haqda taniqli jurnalist Sebastyan Jovanelli xabar bermoqda.

Manbaning ma’lumotlariga ko‘ra, Meksikaning Playya-del-Karmen shahridagi terma jamoa qarorgohini (bazasini) tark etishdan oldin 70 yoshli argentinalik mutaxassis futbolchilar bilan qisqacha suhbat o‘tkazib, musobaqadagi ishtirok yakunlarini sarhisob qilgan. Byelsa birinchi navbatda jamoa yetakchilariga yuzlanib, Jahon chempionatini juda yomon kayfiyatda tark etayotganini, chunki ular uni butunlay yolg‘iz qoldirishganini aytgan.

Eslatib o‘tamiz, Urugvay terma jamoasi «H» guruhida 3 ta o‘yindan so‘ng bor-yo‘g‘i 2 ochko jamg‘arib, 3-o‘rinni egalladi va pley-off bosqichiga chiqa olmadi. Urugvayliklar Saudiya Arabistoni (1:1) va Kabo-Verde (2:2) bilan durang o‘ynashgan bo‘lsa, Ispaniya terma jamoasiga (0:1) imkoniyatni boy berishdi.