Россиянинг «Евро-Футбол.Ру» портали Ўзбекистон миллий терма жамоаси етакчиларига ЖЧ-2026 гуруҳ босқичининг сўнгги турида ДР Конгога (1:3) қарши ўтказилган ўйин учун баҳо қўйди, деб хабар беради Sports.kz.

«Абдуқодир ҲУСАНОВ — 3,0. Ҳусанов учун илк жаҳон чемпионати омадсиз келди. Ҳозирча у фақат тажриба тўпламоқда. Аммо у Висса билан ўта зич ва маҳкам ўйнаш кераклигини билмайдими? Шунга қарамай, Ҳусанов рақибнинг тўпга биринчи бўлиб етиб келишига имкон берди ва оёғига зарба берди — пенальти борасида ҳеч қандай шубҳа йўқ. Учинчи голдан олдин эса Ҳусанов Виссани умуман назар-писанд қилмади — яъни унинг тўпни хотиржам қабул қилиб олганига кўз юмди. Кейин эса Висса ярим майдонни кесиб ўтиб, тўпни узоқ бурчакка жойлаб қўйди.

Аббосбек ФАЙЗУЛЛАЕВ — 7,0. Биринчи бўлимда ЦСКА собиқ футболчиси яхши таассурот қолдирди. Муҳим пасларни амалга оширмади, аммо Шомуродовга «кўринмас ассист» қайд этди: рақиб эътиборини ўзига тортиб, Мозговойнинг узатмасидан сўнг тўпга тегмасликка қарор қилди. Аббосбек ҳимояда ҳам яхши ишлади, уч марта муваффақиятли тўп тортиб олди. Тўрт марта қоидабузарлик қилгани эса унинг жангчилик руҳидан далолат беради. Бироқ иккинчи бўлимда Файзуллаев ва унинг жамоасининг аввалги шижоати йўқолди.

Элдор ШОМУРОДОВ — 7,5. Шомуродов ўз ишини бажарди — чиройли «парашют» зарбаси билан Ўзбекистонга ғалаба келтириши мумкин бўлган голни урди. Агар иккинчи бўлимда «оқ бўрилар» орқага чекиниб, қўрқоқларча ўйнамаганида, жамоа ижобий натижага эришиши мумкин эди. Балки бу Каннаваронинг кўрсатмаси бўлгандир, аммо ҳозир бу ҳақда тахмин қилишнинг ўрни эмас. Биринчи бўлимда Элдор прессингда фаол қатнашди, уч марта тўпни олиб қўйди, яъни жамоага ҳар томонлама ёрдам берди. У кўплаб тўп йўқотгани (22) ва иккинчи бўлим бошида дарвоза тўсини устидан зарба берганини танқид қилиш мумкин. Аммо Ўзбекистон жамоаси ҳужумга ўтишда давом этганида, Элдорда яна вазиятлар бўлиши мумкин эди», — дейилади нашрда.

Эслатиб ўтамиз, Ўзбекистон ЖЧ-2026 гуруҳ босқичи якунларига кўра, очкосиз қолди ва K квартетида тўртинчи ўринни эгаллади. Турнир давомида Фабио Каннаваро шогирдлари Колумбия (1:3), Португалия (0:5) ва ДР Конго (1:3) терма жамоаларига мағлуб бўлишди.