Лондоннинг «Арсенал» клуби «Ньюкасл»нинг италиялик ярим ҳимоячиси Сандро Тоналини сотиб олиш фикридан қайтди. Бу ҳақда The Chronicle нашри хабар бермоқда.

Манбанинг берган маълумотларига кўра, «канонирлар» футболчининг жуда юқори маош талаб қилгани сабабли Тонали трансфери бўйича музокараларни бошламасликка қарор қилишган. Таъкидланишича, ярим ҳимоячи «Арсенал»да йилига 16,6 миллион евро ишлаб топишни, шунингдек, клуб унинг агентига ушбу сумманинг 10 фоизи миқдорида комиссион тўлов тўлашини истаган.

Ҳозирги вақтда «Ньюкасл» билан музокараларни «Тоттенхэм» клуби давом эттирмоқда. Аввалроқ «шпорлар» ушбу трансферни тахминан 116 миллион евро эвазига якунлашга яқин турганликлари ҳақида хабар берилган эди.

Якунланган мавсумда Тонали барча мусобақаларда жами 53 та учрашувда майдонга тушиб, 3 та гол урди ва 7 та голли узатмани амалга оширди.