Инчхон полиция бошқармаси Жаҳон чемпионатидан сўнг Жанубий Корея терма жамоаси ватанга қайтиб келганидан кейин хавфсизликни таъминлаш мақсадида аэропортга 160 нафар ходим сафарбар этилишини эълон қилди.
Бундай қарорга терма жамоа бош мураббийлигидан истеъфога чиқишини эълон қилган мутахассис Хон Мён Бога ўлим билан таҳдид қилинаётгани сабаб бўлган. Шунингдек, хавфсизликни таъминлашга махсус қўриқлаш хизматининг 25 нафар ходими ҳам жалб этилади.
«Биз жамоа етиб келиши вақтида юз бериши мумкин бўлган кўнгилсиз ҳодисаларнинг олдини олиш учун ходимларни юборишга қарор қилдик. Ҳар қандай қонунбузарлик, жумладан, турли буюмларни улоқтириш каби ҳаракатларга нисбатан қатъий чора кўрамиз», — дейилади полиция баёнотида.
Эслатиб ўтамиз, Жанубий Корея терма жамоаси ЖЧ-2026 мусобақасида Мексика, ЖАР ва Чехия терма жамоалари жой олган гуруҳдан чиқа олмади ва учинчи ўринни эгаллади.
