Чехия миллий терма жамоаси бош мураббий Мирослав Коубек билан йўлларини айрди. Бу ҳақда Чехия футбол ассоциацияси расман маълум қилди. Томонлар амалдаги шартномани ўзаро келишувга кўра бекор қилишган.
Коубек 2025 йилнинг декабрь ойида Чехия терма жамоаси бош мураббийи этиб тайинланган эди. Унинг қўл остида шарқий европаликлар ўтиш ўйинларида Ирландия ва Дания терма жамоаларини мағлуб этиб, орадан 20 йил ўтиб илк бор жаҳон чемпионати йўлланмасини қўлга киритишган эди.
Бироқ мундиалнинг ўзида чехларнинг ишлари мутлақо юришмади. Жамоа гуруҳ босқичининг учта турида бор-йўғи бир очко жамғариб, турнирни тарк этди. Чехияликлар дастлаб Жанубий Кореяга (1:2) имкониятни бой беришди, сўнгра ЖАР терма жамоаси билан кутилмаганда дуранг (1:1) ўйнашди ва сўнгги турда Мексикадан йирик ҳисобда (0:3) мағлуб бўлишди.
