Бразилия миллий жамоаси бош мураббийи Карло Анчелотти Жаҳон чемпионати-2026 1/16 финалида Япония устидан қозонилган 2:1 ҳисобидаги ғалабадан кейин ўз фикрлари билан ўртоқлашди.

«Биз бу ҳақда мусобақа бошланишидан олдин ҳам гаплашган эдик. Футболда хатолар бўлиб туради ва уларнинг барчасидан қочиб бўлмайди. Идеал жамоа мавжуд эмас. Муҳими, жамоа бундай вазиятларга қандай муносабат билдириши. Биз айнан шу жиҳат устида ишлаяпмиз. Энг муҳими — олдинга ҳаракат қилишда давом этиш. Иккинчи бўлимда айнан шундай йўл тутдик. Ҳеч ким гол уришимизга шубҳа қилмаганди. Иккинчи таймда ўйинимизни яхшилаб, рақибнинг тезкор қарши ҳужумларига имконият бермасликка ҳаракат қилдик.

Босимни ҳис қилиш — бу одатий ҳолат. Футболда бу янгилик эмас. Ғалабадан кейин енгилликни ҳис қилиш ҳам табиий. Мен доимо шуни ёдда тутаманки, мағлубиятдан кейин бу ерда туриш анча оғир бўлади.

Менимча, бу ҳозиргача мусобақадаги энг яхлит ўйинимиз бўлди. Биринчи бўлимда голли вазиятлар яратиш қийин кечди, чунки рақиб ҳимояда жуда зич ҳаракат қилди. Иккинчи таймда эса қанотдан узатмалар орқали ва тўпни жарима майдонига тез-тез етказиб бериш ҳисобига ечим изладик. Бугун қийинчиликларга дуч келганимизда, уларни ҳал қилиш йўлларини топишга ҳаракат қилдик», — деди Анчелотти.

Жаҳон чемпионати 1/8 финалида Бразилия терма жамоаси Кот-д'Ивуар ҳамда Норвегия терма жамоалари ўртасидаги баҳс ғолиби билан куч синашади.