«Селтик» клуби собиқ бош мураббийи Анге Постекоглу номзоди даъвогарлар қаторида тилга олинаётган бўлса-да, унинг Шотландия терма жамоасини бошқариши амримаҳол. Бу ҳақда talkSPORT эксперти Саймон Жордан маълум қилди.

Аввалроқ хабар берилганидек, Стив Кларк истеъфога чиқарилгач, Шотландия миллий жамоаси бош мураббийлиги курсиси бўшаб қолган ва Постекоглу асосий номзодлардан бири сифатида кўрилаётган эди. Бироқ Жорданнинг фикрича, австралиялик мутахассис катта эҳтимол билан бу таклифни рад этади.

«Агар у молиявий томонлама катта ён босишларга рози бўлмаса, Шотландияни бошқармайди. У ўзини элита даражасидаги мураббий деб ҳисоблайди ва бу лавозим у кутган натижаларни тақдим эта олмайди», — деди эксперт.

Маълумот учун, Шотландия терма жамоаси кузда старт оладиган Миллатлар лигаси мусобақасига қадар янги бош мураббийни тайинлаши лозим.