Норвегия терма жамоаси бош мураббийи Столе Солбаккен ЖЧ-2026 мусобақасининг 1/16 финалида Кот-д'Ивуар устидан қозонилган ғалабадан (2:1) кейин ўз фикрларини билдириб ўтди.
«Бу шундай ҳис-туйғулар ва кучли ҳаяжонки, уни бошқа ҳеч қаерда ҳис қилиб бўлмайди. Биз жисмоний томонлама жуда бақувват, кўплаб вазиятларда курашларда ғолиб чиққан ажойиб жамоага қарши ўйнадик. Учрашувда ташаббус у томонга, бу томонга ўтиб турди ва исталган жамоа ғалаба қозониши мумкиндек туюлди. Менимча, биз бир оз кўпроқ вазиятлар яратдик, шу сабабли умумий олиб қараганда ушбу ғалабага лойиқ эдик. Аммо рақиб мураббийига ачиндим — барчасини кичик деталлар ҳал қилиб кетди», — дея Солбаккеннинг сўзларини келтирмоқда ФИФА матбуот хизмати.
Эслатиб ўтамиз, Норвегия терма жамоаси Кот-д'Ивуарни 2:1 ҳисобида мағлуб этиб, жаҳон чемпионатининг 1/8 финалига йўл олди. Улар ушбу босқичда 5 июль куни Бразилияга қарши майдонга тушишади.
