Ла Лига президенти Хавьер Тебас Мадриднинг «Реал» клуби томонидан «Барселона» фойдасига йўл қўйилган ҳакамлик хатолари юзасидан УЕФАга ҳисобот тақдим этилгани ҳақида фикр билдирди.

«Мен ҳали у ҳисоботни кўрмадим, аммо уни ўқишни жуда хоҳлайман. Улар қайси йилдан бошлаб шикоят қилаётганини, фақат ўзларига қарши чиққан қарорлар ҳақида ёзганми ёки барча клубларга, жумладан "Реал"нинг ўзи фойдасига қабул қилинган қарорларни ҳам тилга олганми — шуни кўрмоқчиман. Агар ҳакамлар хатоларидан шикоят қилишга ҳақи йўқ бирор клуб бўлса, бу — "Реал" Мадрид», — деди Тебас.

Эслатиб ўтамиз, 2023 йилда «Барселона»га собиқ ҳакамлар техник қўмитаси (CTA) вице-президенти Хосе Мария Негрейрага тўланган маблағлар бўйича пора бериш айблови қўйилган эди.

Тергов маълумотларига кўра, каталонияликлар 2001–2018 йиллар оралиғида Негрейрага тахминан 8,4 миллион евро тўлаган.

«Барселона» эса Негрейра ҳакамлик бўйича техник ҳисоботлар тайёрловчи ташқи маслаҳатчи сифатида жалб қилинганини таъкидлаган. Собиқ CTA вице-президенти ҳам ҳакамларга таъсир ўтказиш мақсадида пора олганини рад этган.