Бразилия терма жамоаси бош мураббийи Карло Анчелотти 2026 йилги жаҳон чемпионати 1/8 финалида Норвегияга қарши учрашув олдидан Неймарнинг ҳолати ҳақида гапирди.

Италиялик мутахассиснинг таъкидлашича, 34 ёшли ҳужумчи зарурат туғилса, майдонга тушишга тўлиқ тайёр.

«Неймар ҳақида айтсам, энг муҳими — у ўйнай олади. Жамоа унга эҳтиёж сезаётганини тушунсам, албатта уни майдонга тушираман. Ҳа, у 90 дақиқа давомида ҳам ўйнай олади.

У захира ўриндиғида ўтиришдан мамнун эмас, лекин ўзини жуда профессионал тутади. Неймар машғулотларда аъло даражада ишлаяпти. У жуда ҳурматли ва яхши инсон, жамоадошлари ҳам уни яхши кўришади. У терма жамоамиз учун муҳим шахс, чунки юксак маҳоратга эга бўлиши билан бирга, жуда камтар инсон ҳамдир.

Мен ундан жуда мамнунман. Албатта, у ҳар доимгидек ўйнашни хоҳлайди. У "мен ўйнашни истайман" деб айтмайди, аммо бу шундоқ ҳам аниқ. Бу табиий ҳолат. Захирада қолишдан мамнун бўладиган бирорта ҳам футболчи йўқ», — деди Анчелотти "Ginga Bonito"га берган интервьюсида.