2026 йилги жаҳон чемпионати 1/16 финали доирасида Аргентина ва Кабо-Верде терма жамоалари ўртасидаги учрашув якунланди. АҚШнинг Майами шаҳридаги «Хард Рок» стадионида бўлиб ўтган баҳсда аргентиналиклар қўшимча вақтдан сўнг 3:2 ҳисобида ғалаба қозонди.

29-дақиқада Лисандро Мартинеснинг узатмасидан кейин Лионель Месси ҳисобни очди. 59-дақиқада эса Дерой Дуарте гол уриб, мувозанатни тиклади.

Ўйиннинг асосий вақтида ташаббус Аргентина томонида бўлса-да, ҳисоб бошқа ўзгармади.

Қўшимча вақтнинг 92-дақиқасида бурчак тўпидан сўнг Лисандро Мартинес Аргентинани яна олдинга олиб чиқди. 103-дақиқада Сидни Лопеш Кабрал ажойиб зарба билан ҳисобни яна тенглаштирди.

Учрашув тақдирини эса 111-дақиқада Кристиан Ромеро ҳал қилди. У Лионель Мессининг бурчак тўпидан амалга оширган узатмасидан кейин бош билан аниқ зарба йўллаб, ғалаба голини урди.

Шу тариқа, Аргентина терма жамоаси ЖЧ-2026 1/8 финалига йўл олди. Амалдаги жаҳон чемпионлари кейинги босқичда Миср терма жамоасига қарши майдонга тушади.

Жаҳон чемпионати-2026. 1/16 финал
4 июль, жума
Аргентина — Кабо-Верде — 3:2 (қўшимча вақтдан сўнг)
Голлар: Месси, 29 (1:0), Дерой Дуарте, 59 (1:1), Лисандро Мартинес, 92 (2:1), Сидни Лопеш Кабрал, 103 (2:2), Кристиан Ромеро, 111 (3:2).