Парагвай терма жамоасининг собиқ дарвозабони ва сардори Хосе Луис Чилаверт Жаҳон чемпионатининг 1/8 финали доирасидаги Францияга қарши ўйин олдидан шов-шувли баёнот билан чиқди.
60 ёшли собиқ футболчи ўз ижтимоий тармоқларида Франция терма жамоасининг собиқ ҳужумчиси Кристоф Дюгаррининг французлар Парагвайни ҳеч қандай муаммосиз тор-мор этиши ҳақидаги фикри акс этган скриншотни жойлаштирди. Бунга жавобан Чилаверт шундай деб ёзди:
«Кристоф, сен ҳақсан. 1998 йилда биз Францияга қарши ўйнаган эдик, энди эса Парагвай Африкадан келган жамоа билан тўқнаш келади».
Собиқ дарвозабоннинг ушбу сўзлари ижтимоий тармоқларда кенг муҳокамаларга сабаб бўлди. Франция футбол федерацияси ҳозирча Чилавертнинг гапларига ҳеч қандай муносабат билдирмади.
1998 йилги ўз уйида ўтган жаҳон чемпионатининг 1/8 финалида французлар «олтин гол» эвазига Парагвайни 1:0 ҳисобида мағлуб этишган эди. Энди жамоалар дунё биринчилигининг худди шу босқичида яна тўқнаш келишади. Учрашув 5 июлга ўтар кечаси Тошкент вақти билан соат 02:00 да бошланади.
