Мадриднинг «Реал» клуби марказий ҳимоячиси Виктор Вальдепеньяс фаолиятини Италияда давом эттириши мумкин.
Трансфер янгиликларига ихтисослашган Transfer News Live нашрининг таниқли инсайдер Экрем Конурга таяниб хабар беришича, 19 ёшли футболчи учун «Милан» ва «Болонья» клублари жиддий кураш бошлашга тайёр. Шунингдек, испаниялик ушбу истиқболли фуллбекнинг ривожланишини Лондоннинг «Челси», «Арсенал» ҳамда Франкфуртнинг «Айнтрахт» клублари ҳам синчковлик билан кузатиб боришмоқда.
Маълумот учун, Виктор Вальдепеньяс «қаймоқранглилар»нинг асосий жамоасида ўтган йилнинг декабрь ойида, Ла Лига доирасидаги «Алавес»га қарши учрашувда дебют қилган эди — ҳозирча бу унинг бош жамоа асосий таркибидаги ягона ўйини бўлиб турибди. Чап қанот ҳимоясида ҳам ўйнаш хусусиятига эга бўлган марказий ҳимоячининг трансфер қиймати Transfermarkt портали томонидан 5 миллион еврога баҳоланган.
