Бразилия терма жамоаси бош мураббийи Карло Анчелотти ўзини танқид қилувчилар ва шубҳа билан қаровчиларга жавоб қайтарди. У фақатгина «Манчестер Юнайтед»нинг афсонавий собиқ мураббийи сэр Алекс Фергюсоннинг маслаҳатларини қабул қила олишини, чунки фақатгина у ўзидан кўра кўпроқ учрашувда жамоани бошқарганини тушунтирди.

Folha de S. Paulo нашрига берган интервьюсида Анчелотти ўзига нисбатан бўлаётган танқидларга тўхталар экан, ўз позициясини ҳимоя қилди.

«Италияда шундай гап бор: ҳамма эркаклар мураббий, ҳамма аёллар эса архитектор бўлишни хоҳлашади. Мен футболни тушунаманми ёки йўқми, буни билмайман, лекин ҳеч ким мени бу борада айблай олмайди. Аниқ бўлган ягона нарса шундаки, мен футболчиларни 1400 дан ортиқ учрашувга тайёрлаганман. Балки бу футболни мукаммал тушуниш учун камлик қилар, аммо бу шубҳасиз жуда катта тажриба. Мендан кўра кўпроқ ўйинга футболчиларни тайёрлаган дунёда фақат биргина инсон бор. Бу мураббий сифатида 2000 дан ортиқ учрашув ўтказган Алекс Фергюсондир. Мен ҳамманинг фикрига қулоқ соламан, лекин менга ҳақиқатда маслаҳат бера оладиган ягона инсон — бу Алекс Фергюсон. Мен даҳо эмаслигимга 100 фоиз аминман, лекин шу билан бирга, аҳмоқ эмаслигимга ҳам 100 фоиз ишонаман», — деди Анчелотти.