«Барселона»нинг 22 ёшли хавбеки Марк Касадо Саудиянинг «Ал-Ҳилол» клубига ўтиши мумкин. Бу ҳақда MARCA нашри хабар бермоқда.

Манбанинг маълумотларига кўра, футболчи кўпроқ ўйин амалиётига эга бўлишни истаётгани сабабли «Барселона»ни тарк этишга тайёр. Клуб ярим ҳимоячини 30 миллион евро эвазига қўйиб юборишга рози.

Қайд этилишича, Касадода «Ал-Ҳилол»дан таклиф бор, бироқ у шошилмоқчи эмас. Ўйинчи бу молиявий жиҳатдан фойдали эканини тушуниб турибди, лекин уни кўпроқ спорт лойиҳаси қизиқтирмоқда.

Манбага ишонадиган бўлсак, Касадо Европа клубидан таклиф кутишни хоҳлайди, чунки уни Италиянинг «Милан» клуби ҳам кузатмоқда. Бироқ «Барселона» ярим ҳимоячининг тақдирини жамоа таътилдан қайтадиган 13 июлга қадар ҳал қилмоқчи.