«Ливерпуль» клуби «Кристал Пэлас» ярим ҳимоячиси Адам Уортонга бўлган қизиқишини бироз пасайтирди. Бу ҳақда TEAMtalk нашри хабар бермоқда.
Манбанинг берган маълумотига кўра, айни дамда мерсисайдликлар «Ювентус»нинг 25 ёшли хавбеки Кефрен Тюрамни сотиб олиш имкониятларини кўриб чиқишмоқда. Қайд этилишича, франциялик футболчи аста-секин «Ливерпуль»нинг трансфер бозоридаги устувор мақсадига айланиб бормоқда. Турин клуби эса Тюрамни тахминан 50 миллион евро эвазига сотиб юборишга тайёр.
Туринликлар 2024 йилда Тюрамни «Ницца» клубидан 20,6 миллион еврога сотиб олишган эди. Якунланган мавсумда у барча турнирларни ҳисобга олган ҳолда 45 та учрашувда майдонга тушиб, рақиблар дарвозасини 4 бор ишғол қилди ва 5 та голли узатмани ўз ҳисобига ёздириб қўйди.
