УЕФА Жанни Инфантинони ФИФА президентлиги лавозимидан четлатмоқчи.
Таниқли инсайдер ва журналист Ромен Молинанинг маълум қилишича, УЕФАнинг бир қатор раҳбарлари 2027 йилнинг март ойида бўлиб ўтадиган сайловларда Жанни Инфантинони ФИФА президентлигидан тушириб қолдиришни истамоқда.
Манбанинг берган маълумотларига кўра, ЖЧ-2026нинг 1/16 финалидан ўрин олган Босния ва Герцеговинага қарши ўйиндаги (2:0) четлатилишидан сўнг, АҚШ терма жамоаси ҳужумчиси Фоларин Балогуннинг дисквалификацияси кутилмаганда тўхтатиб қўйилгач, бошқа қитъа конфедерациялари ҳам бу ғояни фаол муҳокама қила бошлашган.
Бундан олдин Оқ уй вакиллари Инфантино билан тўғридан-тўғри боғланиб, вазиятга ва қарорга таъсир ўтказишни сўрагани ҳақида хабарлар тарқалган эди.
«УЕФАнинг бир нечта раҳбарлари анчадан бери саҳна ортида Инфантинога жиддий рақобат туғдира оладиган номзод кўрсатиш устида яширин иш олиб боришмоқда.
Инфантино Дональд Трампнинг кўнглини олиш учун ушбу қарорни қабул қилганидан сўнг, нафақат Европа, балки жаҳон футболининг бошқа етакчилари ҳам унга муқобил излаш лозимлигини муҳокама қила бошлашди. Чунки уларнинг фикрича, "бундай тартибсизлик ортиқ давом этиши мумкин эмас"», — дейилади хабарда.
Эслатиб ўтамиз, Инфантино 2016 йилдан буён ФИФАни бошқариб келмоқда. Кейинчалик у 2019 ва 2023 йиллардаги сайловларда ҳам ушбу лавозимга қайта сайланишга муваффақ бўлган эди.
