Бельгия АҚШ терма жамоаси ҳужумчиси Фоларин Балогуннинг дисквалификацияси кечиктирилгани (тўхтатиб турилгани) юзасидан Спорт арбитраж судига (CAS) мурожаат қилиш имкониятини кўриб чиқмоқда.
Балогун ЖЧ-2026нинг 1/16 финали доирасида Босния ва Герцеговинага қарши кечган ўйинда (2:0) Тарик Мухаремовичнинг тўпиғини босиб олгани учун тўғридан-тўғри қизил карточка олган эди. Кейинчалик футболчининг бир ўйинлик дисквалификацияси бир йиллик синов муддати билан тўхтатиб турилди. Шу тариқа, ҳужумчи 1/8 финалда Бельгияга қарши майдонга туша оладиган бўлди.
Бундан олдин АҚШ Президенти Дональд Трамп ФИФА президенти Жанни Инфантинога икки марта — Балогун майдондан четлатилганидан кейин ва дисквалификация тўхтатиб турилганидан сўнг қўнғироқ қилгани хабар қилинган эди.
Қироллик Бельгия футбол ассоциацияси (RBFA) ФИФАнинг ушбу қароридан «шокда эканлигини» (қаттиқ ҳайратда қолганини) ҳамда «келгуси ҳаракатлар учун барча мумкин бўлган вариантларни» ўрганаётганини маълум қилди.
The Telegraph нашрининг хабар беришича, Бельгия томони судга даъво аризаси киритиш масаласини кўриб чиқмоқда ва ишни Лозаннадаги Спорт арбитраж судига (CAS) ошириши мумкин.
Эслатиб ўтамиз, ЖЧ-2026 1/8 финалидан ўрин олган АҚШ ва Бельгия ўртасидаги учрашув сешанбага ўтар кечаси, 7 июль куни Тошкент вақти билан соат 05:00 да старт олади.
