Бундан бир неча йил аввал Россия футбол иттифоқи президентлигига номзодини қўйган ўзбекистонлик Алишер Аминов Ўзбекистон миллий терма жамоаси бош мураббийи Миржалол Қосимовнинг истеъфо сўраш ҳақидаги қарорига изоҳ бериб ўтди.
"Ўзбекистон терма жамоасининг ЖЧ-2014 саралаш босқичидаги иштирокини таҳлил қилиб, муваффақиятсизликка нима сабаб бўлганини аниқлаш керак. Умуман олганда, Ўзбекистонда футбол изчиллик билан ривожланиб бормоқда. Вилоятларда 7та янги замонавий стадионлар қурилмоқда.
Федерацияда мутахассисларни илмий-услубий жиҳатдан тайёрлаш юқори савияда йўлга қўйилган. У ерда футбол назарияси ва услубиёти бўйича 5 нафар фан номзоди фаолият юритишмоқда. Равшан Эрматов ФИФАнинг энг яхши 3 нафар ҳакамлари орасига киради.
РФИдан фарқли равишда ЎФФ миллионли шартнома эвазига миллий терма жамоага хориждан мураббий таклиф қилмайди. Ушбу лавозимга "Пахтакор", "Днепр" клубларининг собиқ футболчиси, ҳозирда "Олмалиқ"қа бош мураббийлик қилаётган Игорь Шквириннинг номзоди муносиброқ. Бошқа вариантлар ҳам бор. Масалан, "Андижон" бош мураббийи Азамат Абдураимов. Ҳар қандай ҳолатда ҳам Ўзбекистон футбол федерацияси кўп мутахассисларнинг фикрини инобатга олиб, кенгашган ҳолда бир қарорга келади.
Фақат Россиядагина мутахассисларнинг фикрини инобатга олмаган ҳолда, Спорт вазири ва РФИ президентининг фикри билан ақлбовар қилмас маблағ эвазига Россия терма жамоасига мураббий тайинланиши мумкин", дейди Рустам Акромовнинг жияни бўлган Алишер Аминов.
