Мадриднинг «Реал» клуби дарвозабони Тибо Куртуа жаҳон чемпионати чорак финалида Бельгия терма жамоасининг Испанияга қарши ўйинида олган мушак жароҳати туфайли янги мавсум бошланишини ўтказиб юбориши мумкин.

Defensa Central маълумотларига кўра, спорт физиотерапияси бўйича мутахассис Анхель Вильянуэва дарвозабоннинг тикланиш муддатини 4–8 ҳафта деб баҳолаган. Дастлабки маълумотларга кўра, чап оёқ сон тўғри мушагининг шикастланиши ҳақида сўз бормоқда, бироқ якуний ташхис тиббий текширувдан сўнг белгиланади.

Агар тахмин тасдиқланса, Куртуа «Реал»нинг янги мавсумдаги илк ўйинларини ўтказиб юборади. Мавсум стартида унинг ўрнини Андрей Лунин эгаллаши мумкин.

Испания билан ўйиндан сўнг бельгиялик посбон ўйинни давом эттиришга тайёр бўлганини билдирган, аммо бош мураббий Руди Гарсия уни алмаштиришга қарор қилган эди. Унинг ўрнига майдонга тушган Сенне Ламменс хатога йўл қўйди ва бу испанияликларнинг гол уришига сабаб бўлди.