«Марсель» вингери Мэйсон Гринвуд тез орада Туркиянинг «Фенербахче» клуби футболчисига айланади. Бу ҳақда журналист Николо Скира хабар бермоқда.

Манбага кўра, Гринвуднинг трансфери якуний босқичда. «Фенербахче» футболчининг хариди учун 45 миллион евро тўлаши кутилмоқда. Гринвуднинг ўзи эса 2030 йилгача мўлжалланган меҳнат шартномасини имзолайди ва унга кўра мавсумига саккиз миллион евро маош олади. Шунингдек, у бонуслар кўринишида яна икки миллион еврогача ишлаб топиши мумкин.

Ўтган мавсумда вингер барча мусобақаларда жами 45 та ўйинда майдонга тушди. Ушбу вақт ичида у 26 та гол урди ва 11 та голли узатмани амалга оширди.