Англия терма жамоаси бош мураббийи Томас Тухель 2026 йилги жаҳон чемпионати ярим финалида Аргентинага 1:2 ҳисобида мағлуб бўлган ўйин ҳақида фикр билдирди.
Немис мутахассисининг сўзларига кўра, жамоаси ҳисобни очганидан кейин ҳаддан ташқари эҳтиёткор ўйнаб, ташаббусни рақибга бой берган.
«Биз жуда хафамиз. 1:0 ҳисобида олдинга чиққанимиздан кейин жуда пассив ўйнай бошладик. Мен беш нафар ҳимоячи билан ўйнаш схемасига ўтишга қарор қилдим, чунки чизиқлар орасида жуда кўп бўш ҳудудлар пайдо бўлганди, Аргентина эса деярли барча юқори тўплар учун курашда устун келаётган эди», — деди Тухель.
Англия устози ўйин схемасини ўзгартириш ҳақидаги қарори танқид қилинишига ҳам муносабат билдирди.
«Ўйин омадсиз якунланса, қарорларим нотўғри бўлганини айтиш доим осон. Аммо муаммо ўйин схемасида эмасди — учрашувнинг ўзи бутунлай ўзгариб кетди. Бу қарорлар муҳокама қилиниши табиий. Ўзини мендан яхшироқ билади деб ҳисоблайдиган миллионлаб мураббийлар бор. Мен улар билан баҳслашишим мумкин, аммо қарорларни қабул қиладиган инсон айнан менман», — дея таъкидлади Тухель.
Эслатиб ўтамиз, Англия Энтони Гордоннинг голи билан ҳисобни очган эди. Бироқ учрашув сўнгида Аргентина камбэк амалга оширди: Энцо Фернандес ҳисобни тенглаштирди, Лаутаро Мартинес эса 90+2-дақиқада ғалаба голини киритиб, амалдаги жаҳон чемпионларини ЖЧ-2026 финалига олиб чиқди.
