Angliya terma jamoasi bosh murabbiyi Tomas Tuxel 2026 yilgi jahon chempionati yarim finalida Argentinaga 1:2 hisobida mag‘lub bo‘lgan o‘yin haqida fikr bildirdi.

Nemis mutaxassisining so‘zlariga ko‘ra, jamoasi hisobni ochganidan keyin haddan tashqari ehtiyotkor o‘ynab, tashabbusni raqibga boy bergan.

«Biz juda xafamiz. 1:0 hisobida oldinga chiqqanimizdan keyin juda passiv o‘ynay boshladik. Men besh nafar himoyachi bilan o‘ynash sxemasiga o‘tishga qaror qildim, chunki chiziqlar orasida juda ko‘p bo‘sh hududlar paydo bo‘lgandi, Argentina esa deyarli barcha yuqori to‘plar uchun kurashda ustun kelayotgan edi», — dedi Tuxel.

Angliya ustozi o‘yin sxemasini o‘zgartirish haqidagi qarori tanqid qilinishiga ham munosabat bildirdi.

«O‘yin omadsiz yakunlansa, qarorlarim noto‘g‘ri bo‘lganini aytish doim oson. Ammo muammo o‘yin sxemasida emasdi — uchrashuvning o‘zi butunlay o‘zgarib ketdi. Bu qarorlar muhokama qilinishi tabiiy. O‘zini mendan yaxshiroq biladi deb hisoblaydigan millionlab murabbiylar bor. Men ular bilan bahslashishim mumkin, ammo qarorlarni qabul qiladigan inson aynan menman», — deya ta’kidladi Tuxel.

Eslatib o‘tamiz, Angliya Entoni Gordonning goli bilan hisobni ochgan edi. Biroq uchrashuv so‘ngida Argentina kambek amalga oshirdi: Enso Fernandes hisobni tenglashtirdi, Lautaro Martines esa 90+2-daqiqada g‘alaba golini kiritib, amaldagi jahon chempionlarini JCH-2026 finaliga olib chiqdi.