Англия терма жамоаси сардори Харри Кейн 2026 йилги жаҳон чемпионати ярим финалида Аргентинага 1:2 ҳисобида мағлуб бўлганидан сўнг ўз фикрлари билан ўртоқлашди.

Форварднинг таъкидлашича, Англия ўйиннинг катта қисмида назоратни қўлда ушлаб турган, аммо ҳисоб тенглаштирилганидан кейин устунликни сақлаб қола олмаган.

«Биз жуда хафамиз — жамоамиз, мухлисларимиз ва бизни қўллаб-қувватлаган барча инсонлар учун. Сўнгги дақиқаларгача яхши ўйин намойиш этдик, аммо ҳисоб 1:1 бўлганидан кейин ўз жарима майдонимизга жуда чекиндик ва натижани сақлаб қолишга уриндик. Бу эса етарли бўлмади.

Бу ергача етиб келиш учун жуда кўп меҳнат қилдик ва қўлимиздан келган барча ишни бажардик. Аммо мусобақани шундай тарзда якунлаш жуда оғир. Биринчи бўлимда юқори прессингимиз яхши ишлади, танаффусдан кейин эса Аргентина босимни кучайтирди. Биз иккинчи тўплар учун курашда ютқаза бошладик, ўйин назоратини бой бердик ва яккакурашларда ишончли ҳаракат қила олмадик.

Рақибнинг жарима майдонига узатмалар орқали хавф туғдиришга уринишини билардик, аммо бунга қарши чора топа олмадик ва ўйинга қайта олмадик. Мағлубиятга қарамай, ушбу турнирда яхши ўйинларимиз кўп бўлди. Ярим финалгача етиб келдик, характер намоён этдик ва олти ҳафта давомида улкан меҳнат қилдик. Шу жиҳатдан фахрланишимиз мумкин», — деди Кейн.

Эслатиб ўтамиз, Англия Энтони Гордоннинг голи эвазига ҳисобни очган эди. Бироқ учрашувнинг сўнгги қисмида Энцо Фернандес ҳисобни тенглаштирди, Лаутаро Мартинес эса 90+2-дақиқада ғалаба голини киритиб, Аргентинани финалга олиб чиқди. Энди англияликлар жаҳон чемпионатининг учинчи ўрни учун бўладиган баҳсда Францияга қарши майдонга тушади.