“Манчестер Сити” марказий ҳимоячиси ва Ўзбекистон миллий терма жамоаси аъзоси Абдуқодир Ҳусанов Беларус футбол федерацияси раҳбарияти билан учрашди. Бу ҳақда ташкилот матбуот хизмати хабар берди.
Учрашув 15-июль куни федерациянинг Минскдаги бош қароргоҳида бўлиб ўтган. Маълумки, Ҳусановнинг профессионал фаолиятида Беларус футболи алоҳида ўрин тутади. Футболчи айнан пойтахтнинг “Энергетик-БГУ” клубида ўзини кўрсатиб, кейинчалик Франциянинг “Ланс” жамоасига ўтган. Ушбу клубдаги ёрқин ўйинларидан кейин Абдуқодир Англиянинг “Манчестер Сити” клуби эътиборига тушди ва 2025-йилнинг январ ойида инглиз жамоаси сафига қўшилган.
Ҳусанов фаолиятидаги дастлабки йиллар ҳақида гапирар экан, “Энергетик-БГУ”даги машаққатли кунларини эслади:
“Барчасини жуда яхши эслайман. Анатолий Иванович Юревичга раҳмат айтаман, айнан у туфайли "Ланс"га ўта олганман. Беларус чемпионати менга жуда кўп нарса берди. Энг кўп нима эсимда қолган? Ивановичнинг мени роса койишлари (кулади). Бир сафар машғулотда жароҳат олганимда, оғриққа қарамай машғулотни давом эттиришимни талаб қилган. Ўшанда ёш эдим, оғриқни сабр билан енгишга тўғри келган”, дейди футболчи.
Мураббий Анатолий Юревич эса ўз шогирдининг муваффақиятини шундай изоҳлайди:
“Ҳусановда икки нарса юқори даражада — характер ва ўрганишга бўлган қобилият. Бизнинг кўплаб ёшларимизда истеъдод етарли, аммо уларда ишчанлик ва мотивация етишмайди. Ҳусанов эса ўз устида тинимсиз ишлайди. Мураббий ишни тўғри таклиф қилиши, футболчи эса уни онгли равишда бажариши керак. Мана шу уйғунликдан ҳақиқий футболчи пайдо бўлади”.
Маълумот учун, Абдуқодир Ҳусанов Ўзбекистон терма жамоаси билан 2026-йилги Жаҳон чемпионатида дебют қилди. Каннаваро бошчилигидаги жамоа гуруҳдаги барча ўйинда мағлуб бўлиб, мусобақадаги иштирокини эрта якунлади.
