Аргентина вице-президенти Виктория Вилярруел Жаҳон чемпионати яримфиналида Англияга қарши кечадиган баҳс олдидан рақибларни “босқинчи қароқчилар” дея таърифлади. Бу баёнот икки давлат ўртасидаги узоқ йиллик ҳудудий низо фонида янгради.

“Биз босқинчи қароқчиларга қарши ўйнаймиз. Бу шунчаки навбатдаги ўйин эмас. Мен сиёсий жиҳатдан босиқ бўлишни ёки совуққонликни сақлашни хоҳламайман. Инглизларга қарши баҳслар доим қандайдир каттароқ аҳамият касб этган. Бу — Малвин (Фолькленд) ороллари, бу — Диего, бу — Леонинг сўнгги уриниши ва бу — босқинчиларни ўз жойига ўтказиб қўйиш имкониятидир”, дейди вице-президент.

Шунингдек, у аргентиналик мухлислар томонидан турнир давомида куйланаётган машҳур чорловни ҳам эслатиб ўтди: “Олға, Аргентина! Токи сўнгги нафасимиз қолгунича, ўзимизга тегишли бўлган нарсани талаб қилишда давом этамиз!”

Қайд этиш жоизки, Виктория Вилярруелнинг отаси 1982-йилда Аргентина ва Буюк Британия ўртасида Жанубий Атлантика ороллари учун кечган Фолькленд урушида қатнашган. 74 кун давом этган ва британияликларнинг ғалабаси билан якунланган тўқнашувларда 655 нафар аргентиналик ва 255 нафар британиялик ҳарбийлар ҳалок бўлган. Ушбу ҳудуднинг суверенитет масаласи ҳамон баҳсли бўлиб қолмоқда.

Маълумот учун, Жаҳон чемпионати яримфинал баҳсида Аргентина Англияни 2:1 ҳисобида мағлуб этиб, финал йўлланмасига эга чиқди. Ҳал қилувчи учрашув 19-июльдан 20-июльга ўтар кечаси, Ўзбекистон вақти билан роппа-роса 00:00 да старт олади.